ТР Дәүләт төзелеш күзәтчелеге инспекциясе башлыгы урынбасары полилингваль мәктәп төзелешен бәяләде
Татарстан Республикасының Дәүләт төзелеш күзәтчелеге инспекциясе башлыгы урынбасары Линар Фатыйхов планлы эш кысаларында Алабуга, Түбән Кама һәм Яр Чаллыда булды, анда ул социаль әһәмиятле объектлар төзелеше белән танышты.
Алабугада ул «Адымнар-Алабуга» полилингваль мәктәбен карады. Объектта төзелеш эшләре ахырына якынлашып килә. Мәктәпнең әзерлек дәрәҗәсе 90% тәшкил итә.
Бүгенге көндә эшчеләр яңа бинаның эчке ягын бизәкләү, эчке инженерлык челтәрләрен монтажлау эшләрен төгәлли, территорияне төзекләндерү эшләрен башкара. Төзүче оешма объектны 2020 елның август башында тапшырырга планлаштыра.
Түбән Камада Линар Фатыйхов Тукай урамында урнашкан футбол манежын карады. Хәзерге вакытта объектта гомумтөзелеш эшләре тәмамланган, эчке һәм тышкы инженерлык челтәрләрен монтажлау, эчке бизәкләү эшләре, вентиляцияләнә торган фасадны урнаштыру, якындагы территорияне төзекләндерү эшләре бара. Төзүче оешма мәгълүматларына караганда, объектның әзерлек дәрәҗәсе 75% тәшкил итә.
Сәфәр ахырында Инспекция башлыгы урынбасары Яр Чаллы шәһәрендә төзелә торган татар драма театры белән танышты. Хәзерге вакытта объектта вентиляцияләнә торган фасадны монтажлау эшләре тәмамланып килә, тамаша залы конструкцияләрен урнаштыру эшләре бара, бизәкләү эшләренә керешкәннәр, эчке инженерлык челтәрләрен монтажлыйлар. Әзерлек дәрәҗәсе 70% тәшкил итә. Төзүче оешма объектны 2020 елның сентябрендә тапшырырга планлаштыра.